Na manifestaziun por düc
Se perde, falè jö strada tla liberté, s’un sciampè da n monn sigü o restè sarà laìte: la fortëza de Franzensfeste cun sü mürs massifs, sü porti sottera, sü büsc da stlopetè y sü cucheri de verda é la culissa ideala por le tema dla mostra interregionala 2009. Chilò pòn sintì pro vigni vare ch’an fej le „Labirint::Liberté“. La fortëza instëssa, costruida „por n nemich che ne s’à mai lascè odëi“, sciöche Josef Rohrer à scrit, cunta la storia dla cultura tiroleja dl’ (auto) defenüda, che mët man trö’ dan 1809 y mostra sö süa fragilité interna bele cotan dan le 2009. „Labirint::Liberté“ n’é nia na mostra che s’impegnëia da recordè les batalies por la liberté dl Tirol dl 1809, mo ti va do al mit dla liberté cun na gran flessibilité temporala y tematica.

La liberté é storica, mo inc´e zënza tëmp, che sciampa fora dles mans, mo inc´e presënta, anfat sc’ara se trata dla liberté de n raiun o dla liberté dla singola porsona. Impéde na „gran storia“ vëgnel cuntè deplü stories, che tol en conscidraziun documënc´ storics, esperiënzes de porsones, provocaziuns artistiches. La mostra interregionala 2009 n’ó nia descrì o documentè c´i che la liberté é, mo plütosc portè la jënt a ponsè do olache la liberté mët man, olach’ara se röia, olache la liberté é stlavité y olache la stlavité pò ester a val’ manira liberté: na mostra te chëra ch’an po se perde o se ciafè.